Ақсу қаласы білім беру бөлімінің әдістемелік кабинетінің жоспарына сәйкес 2026 жылғы 16 қазан күні Ақсу қаласының Ы. Алтынсарин атындағы қазақ орта мектебінде тарих, құқық негіздері және география пәндерінің айлығы аясында Педагогикалық шеберлік орталығы мамандарымен бірлескен «Тиімді сабақ дизайны: оқу мақсаты, белсенді оқыту және нәтижеге бағытталған бағалау» тақырыбында семинар-практикум өткізілді.Семинарға Павлодар қаласындағы Педагогикалық шеберлік орталығының тренері Альмаганбетов Қайыржан Сағынтайұлы қатысып, педагогтерге сабақ дизайнын тиімді құрудың маңыздылығын түсіндірді.Мектеп басшысы Егис Индира Егисқызы мектепте білім сапасын арттыру, білім алушылардың біліміндегі олқылықтарды жою және олардың жеке қабілеттерін дамыту бағытында жүйелі жұмыстар жүргізіліп жатқанын атап өтті. Оқушылардың білім деңгейлерін ескере отырып, қосымша сабақтар кестесі әзірленіп, пәндер бойынша білімдерін толықтыру және күрделі тақырыптарды меңгерту жұмыстары ұйымдастырылуда.Сонымен қатар ҰБТ-ға және пәндік олимпиадаларға дайындық жұмыстары жүргізіліп, оқушылардың пәндік білімдерін тереңдетуге, тест тапсырмаларын орындау дағдыларын қалыптастыруға және оқу нәтижелерін жақсартуға басымдық берілуде.Жас педагогтермен жұмыс бағытында олардың кәсіби бейімделуіне, педагогикалық шеберлігін арттыруына және сабақ беру тәжірибесін жетілдіруіне әдістемелік қолдау көрсетіліп, тәлімгерлік жұмыстар ұйымдастырылуда.Қорытындылай келе, семинар-практикум педагогтердің сабақ дизайнын тиімді құрастыруына, белсенді оқыту әдістерін қолдануына және білім алушылардың оқу жетістіктерін нәтижеге бағытталған бағалауына ықпал етті.